طريقه عمل القرع العسلى الحلو
موضوعى اليوم طعمه حلو وريحته احلى وهو طريقه عمل صنيه قرع عسلى حلوه بس بتكات
تشرفك قدام عيلتك تعالى اقولك سر الخلطه يارب اكون افدتك
- قرع سكر قطعه زبده مقادير طبقه الباشميل 3ملاعق دقيق او حسب الكميه اللى هتعمليها زبده
كوبايه لبن (محلى بالسكر)+الميه اللى نزلت
- التحضير: بنشترى القرع ونفتحه ونضفه من البذر اللى جواه ونبتدى نقطعه شرائح رفيعه بالسكينه او
بقشاره البطاطس اسهل بكتير - الطبخ: بعد مابنقشره بنحطه فى حله وعليه سكر (حسب الرغبه) وقطعه زبده واقلبهم واهدى عليهم
النار ومتخفيش هو هينزل الميه بتاعته وكل فتره اطمن عليه واقلبه واضغط عليه بالشوكه عشان
يتفتفت معايا هتعرفى انه استوى الزاى لما تحسى ان شكله بقا زى المربى كده وميته
نقصت منه واما تضغطى عليه هتلاقيه استوى
بعد ماستوى شوفتوا بقا عامل الزاى (بعد ماطلعت عينه بالشوكه ) بحطه فى مصفى وتحتها
طبق عشان يصفى كل ميته وينشف خالص واواعى ترمى ميته دى هقولك هنعمل بيها ايه
فى الخطوات اللى جايه
بعد مالقرع صفى ميته بفرده فى صينيه مدهونه زبده واحط عليه حوالى ربع كوبايه لبن
(اختيارى)
وانا عن نفسى مبحبذش انى احط لبن فى القرع نفسه لانى لسه هعمل طبقه باشميل
فمش عايزه الدنيا تبقى لبن xلبن
نسيب الصينيه دى بقا ع جنب ونحضر طبقه الباشميل
مقادير طبقه الباشميل بقا
3ملاعق دقيق او حسب الكميه اللى هتعمليها
زبده
كوبايه لبن (محلى بالسكر)+الميه اللى نزلت من القرع فاكرينها اللى قولت مترموهاش تمام كده
وحاولى تعادلى فى السكر لان ميه القرع مسكره يعنى متزوديش كميه السكر فى اللبن ودوقى
الباشميل وانتى بتعمليه لو احتاجتى سكر يبقى زودى ع حسب احتياجك
اول حاجه بنحط الزبده تسيح وبعدين ننزل بالدقيق نشوحه شويه كده وبعدين ننزل بميه القرع
ونقلب كويس عشان ميكتلش معايا وبعدين بحط معلقه قشطه واقلب وبعدين بنزل باللبن شويه بشويه
لغايه مااوصل لقوام الباشميل اللى انا عيزاه ويحبذ يبقى قوامه متوسط
ونحط طبقه الباشميل ع القرع اللى فى الصينيه ونحط فوق الوش قشطه عشان الوش يحمر
ويبقى لونه جمييل وكمان طعم جمييل وندخلها الفرن لغايه ماوشها يحمر
بعد ماخرجت من الفرن سيبها تبرد شويه وبعدين تدخل التلاجه وتقدم بارده
