شعر في مدح الرجال
الرجال هما الامان هما نصف المجتمع الثانى هما العمل هما الاطمانان للمراءه ان الرجال هما
من يقفون وقت الشده مع الاخرين
اختار سمحات الدروب النظيفه اللي غسلها رايح المزن برشاش
مشونها قوم النفوس الشريفه == اللي ضمايرهم نقيه كما الشاش
ابيوتهم مثل الحصون المنيفه == ما هي لطير البوم غيران واعشاش
وحلالهم للضيف دايم مريفه = لو رجلهم يسرح ويضوي على ماش
والرجل منهم ما يخلي رديفه = ان ما ت مثله مات وان عاش له عاش
وان مات منهم رجل عقب خليفه = يطعن نحور القوم ويرد الادباش
يعرف هدف روحه ويعرف وليفه = ما يعرف الخونه ولا هو بغشاش
وليا رزقه الله بعذراء عفيفه = ايحطها ما بين نونه والارماش
ماهو على الخفرات يستل سيفه = وان طالعوا فيه الرياجيل ينحاش
حلو النبا سمح المحيا لضيفه = ويصير له خادم مسخر وفراش
وان مد ما مدت يمينه قصيفه = مدت يمينه تبهر الخبل واللاش
واليا هرج تلقى علومه طريفه = ما هو لهفوات المناعير منقاش
وان شبت النيران ما هو بليفه = في ساعه الكربه سواي ورشاش
سده بعيد ولا احد يعرف غريفه = ولا هو لعرض المكرم العرض نهاش
والشوك في جنبه سوات القطيفه = ان كان ما له بيت مامون وافراش
ما يرتكي فوق الخبول الضعيفه = اللي ليا حركتها قدرها طاش
وان جا نهار كل قرم يعيفه = ما هو ليا ثارت على القوم رماش
الكذب يعرف بين الجواد زيفه = والصدق مثل السيف صاطي وحشاش
وصحيفته يا طيبها من صحيفه = ولها من العقال كاتب ونقاش
حاز المراجل والمراجل كليفه = الا على اللي كل ما رامها هاش
وان شاف له من جانب القوم خيفه = تلقاه للخيفه مهاجم وبطاش
الصدق والمعروف والطيب كيفه = ويغبش لها مع طلعه الفجر مغباش
للحمل ما تلقى جنوبه صخيفه = حوله بروق تعمي العين وافلاش
يصبر على جرحه ويمسح نزيفه = طبه بشبه خير من طب الاحباش
ولا هو كما سبع سنونه ضعيفه = دايم يلحسها وللعظم عراش
وان شاف له في غيبه الناس شيفه = ما هو بخبل لاخضر العود قراش
دنياه لن صارت ذلول عسيفه = طوع علهيا كل عاصي ونفاش
وان كان قفت ما عليها حسيفه = ولا هو ورا هوج المعاصير قشاش
وان جاع ما وقع كما طير جيفه = وان عري ما يلبس سماليل وخياش
- كلام في مدح الرجال
