قصائد عن الرجل اشعار عن الرجل شعر عن الرجال قصيد عن الرجال
اختار سمحات الدروب النظيفه
اللي غسلها رايح المزن برشاش
مشونها قوم النفوس الشريفه
اللي ضمايرهم نقيه كما الشاش
بيوتهم مثل الحصون المنيفه
ما هي لطير البوم غيران اعشاش
وحلالهم للضيف دايم مريفه
لو رجلهم يسرح ويضوي على ماش
والرجل منهم ما يخلي رديفه
ان ما ت مثله مات وان عاش له عاش
وان مات منهم رجل عقب خليفه
يطعن نحور القوم ويرد الادباش
يعرف هدف روحه ويعرف وليفه
ما يعرف الخونه ولا هو بغشاش
وليا رزقه الله بعذراء عفيفه
ايحطها ما بين نونه والارماش
ماهو على الخفرات يستل سيفه
وان طالعوا فيه الرياجيل ينحاش
حلو النبا سمح المحيا لضيفه
ويصير له خادم مسخر وفراش
وان مد ما مدت يمينه قصيفه
مدت يمينه تبهر الخبل واللاش
واليا هرج تلقى علومه طريفه
ما هو لهفوات المناعير منقاش
وان شبت النيران ما هو بليفه
في ساعه الكربه سواي ورشاش
سده بعيد ولا احد يعرف غريفه
ولا هو لعرض المكرم العرض نهاش
والشوك في جنبه سوات القطيفه
ان كان ما له بيت مامون وفراش
ما يرتكي فوق الخبول الضعيفه
اللي ليا حركتها قدرها طاش
وان جا نهار كل قرم يعيفه
ما هو ليا ثارت على القوم رماش
الكذب يعرف بين الاجواد زيفه
والصدق مثل السيف صاطي وحشاش
وصحيفته يا طيبها من صحيفه
ولها من العقال كاتب ونقاش
حاز المراجل والمراجل كليفه
الا على اللي كل ما رامها هاش
وان شاف له من جانب القوم خيفه
تلقاه للخيفه مهاجم وبطاش
الصدق والمعروف والطيب كيفه
ويغبش لها مع طلعه الفجر مغباش
للحمل ما تلقى جنوبه صخيفه
حوله بروق تعمي العين وفلاش
يصبر على جرحه ويمسح نزيفه
طبه بشبه خير من طب الاحباش
ولا هو كما سبع سنونه ضعيفه
دايم يلحسها وللعظم عراش
وان شاف له في غيبه الناس شيفه
ما هو بخبل لاخضر العود قراش
دنياه لن صارت ذلول عسيفه
طوع عليها كل عاصي ونفاش
وان كان قفت ما عليها حسيفه
ولا هو ورا هوج المعاصير قشاش
وان جاع ما وقع كما طير جيفه
وان عري ما يلبس سماليل واخياش
شعر اخر يتحدث عن مدح الرجال
والله ماني على مدح الرياجيل بخيل
خاصه لا جيت امدح في زحول الرجال
المشكله مدحهم حمل لا شلته ثقيل
من ثقلها ما يقدر عليها كبار الجمال
حتى لو تحاملت على حملها لا بد يميل
مال الجمل حيله على حمل الاثقال
اجل وش حيله قلم بالقصايد يخيل
في معانيها صدق من مزون الخيال
قصيده ما هي غزل فالطرف الكحيل
ولا هي عتاب وشكوه حال دون حال
قصيده مدح في ذاك الشهم الاصيل
ابو عبدالله اللي يشهد له فوح الدلال
سلام يا ابو عبدالله يازحول الرياجيل
سلام عد ما على الصحاري من رمال
سلام عد ماهل المطر وسال المسيل
سلام عد ما اشرقت الشمس وطل الهلال
سلام ياللي له في قلبي مقر ومقيل
فداك العمر لو ان العمر للفنا والزوال
قالوا عن حاتم ماله في الكرم مثيل
ومن ذيك العصور تضرب به الامثال
وانا اقول ابو عبدالله حاتم هالجيل
قولوا لهتان الكرم عندنا للكرم زلال
فديت كل حرف من اسمه به خصل نبيل
ويا حي الحروف اللي لها فالقلب منزال
الصاد (صدقك) فالكلام من دون تاويل
ويا حي الرجال اللي تثبت اقوالها بافعال
الالف (اهاتك)عطني ياها لو توريني الويل
ماهمني غير شوفه بسمتك ياطيب الفال
اللام (لومك) فالحياه على كل شخص ذليل
عاش في هالدنيا وتطبع بطبع الانذال
الحاء (حبك) للمساكين وعابرين السبيل
وشموخك في هالدنيا كنه شموخ الجبال
شوف حالي مال السعاده بحياتي دليل
وفي غيبتك مال الصبر عندي اي مجال
النهار اسود ما عاد به فرق مع الليل
اسهر عيوني ودمعها على الخد همال
واتجه للقبله واطلب من الله الجليل
يالله يالله ترد من بغيابه علينا طال
تكفى تراني دخيل الله ثم عليك دخيل
مال السهر والصبر عندي اي احتمال
عطنا من باقي عمرك ووقتك القليل
ودي ادفى بك واحس ان للعز ظلال
ليه لا شفتك تقتل فرحتي بالرحيل
ما مداني اقولك وشلونك وكيف الحال
طلبتك تدور لاسلوب حياتك بديل
ما عاد اطيق بهالدنيا سالفه الترحال
وعيني ما عاد لها على السهر حيل
ما تدري انت فالجنوب ولا فالشمال
هذي نظم حروف قصيدي جاتك مبيل
لا تشكي عليك من همووم اللياليالطوال
- اشعار عن الرجل الشهم
- أشعار عن الرجل العظيم
- شعر عن الرجل الانسان
- شعر في مدح الرجال
- أشعار عن العالم العظيم
- اشعار عن شوفه الحال
- مسحات عن الرجل العظيم
- شعر عن الانسان العظيم
- شعر عن الرجل العظيم
- شعر عن الرجل النبيل
