المغرب، المملكه المغربيه، المملكه المغربيه الشريفيه ، مراكش (فرنساوى: Royaume du Maroc)، هى مملكه كبيره وليها تاريخ عريق فى شمال افريقيا، بتطل على البحر المتوسط و المحيط الاطلنطى و جبل طارق، و ليها حدود مع الجزاير و موريتانيا و اسبانيا. عدد سكان المغرب 33 مليون انسان و مساحتها 175,186 ميل 2 (453,730 كم2)،[1][2] و لما تشمل الصحرا الغربيه المتنازع عليها، تزيد مساحه اراضى مملكه المغرب ل 274,460 ميل 2 (710,850 كم 2).[3]
اكبر مدينه فى المغرب هى الدار البيضاء (كازابلانكا) و العاصمه السياسيه بتاعتها هى الرباط. المغرب فيها ثقافه و فنون عريقه و لعبت الدور الرئيسى فى حضاره الاندلس و ده انعكس على الشخصيه المغربيه الحديثه المتذوقه للثقافه و الفن.
جغرافيه و اقتصاد المغرب
الطرق الحديثه بتنتشر فى المغرب.
بتنقسم المغرب لكذا منطقه طبيعيه كل منطقه ليها ميزه خاصه و هى : جبال الريف و حوض نهر سبو و نجود المحيط الاطلنطى و سلسله جبال اطلس و المغرب الشرقى و المغرب الصحراوى. منطقه نجود شاطىء الاطلنطى منطقه خصبه بتشتهر بزراعه القمح و الفواكهو الخضار. و فى المغرب كذا بحيره اهمها فى جبال اطلس زى بحيره سيدى على و البحيره الزرقاء و ادلى و غيرها.. اهم الانهار فى المغرب هى نهر ام الربيع و نهر ابو الرفراق وسبو و فروعه و وادى درعه.
بيعتمد اقتصاد المغرب على الزراعه، و تربيه المواشى، و محصولات الغابات الواسعه زى شجر الزان الاخضر و الارز و الصنوبر ، و صيد الاسماك (اهم مراكزه فى اسفى و اغادير و فضاله و العرائش). و المغرب غنى بالمعادن زى الفوسفات و الحديد و الفحم الحجرى و الرصاص و المنجنيز و النحاس و الزنك و القصدير و الكوبلت. و فيه فى المغرب صناعه دباغه الجلود والمنتجات و القدر النحاس و النسيج و الصابون و المطاط و الورق، و بتستغل الطاقه المتولده من السدود اللى اتبنت بين الوديان. و اتطورت السياحه فى المغرب و بقت من المصادر المهمه للدخل القومى.
و بتعتبر كازابلانكا ( الدار البيضاء ) المركز الرئيسى للمواصلات الجويه. و اهم موانى المغرب : مرسى الدار البيضاء و مينه فضاله و القنيطره و اسفى و اغادير و طنجه و العرائس و كلها بتطل على المحيط الاطلنطى و على البحر المتوسط فيه مينه الناظور.
التاريخ
جامع الكتبيه فى مراكش تحفه من التراث المغربى.
المغرب بلد عريق موقعه ملتقى للثقافات الاوروبيه و الاسلاميه و الافريقيه. اتوالى على حكم المغرب ملوك كبار و دول سابوا اثارات و تحف رائعه ليها طابع مميز. علاقه المغرب بمصر علاقه قديمه و كويسه بتدل عليها مراسلات سلاطين مصر و ملوك المغرب ، و حجاج المغرب كانوا بيعدوا على مصر فى روحتهم وجيتهم و كان فيه مجتمع مغربى عايش فى القاهره و اسكندريه و كان منهم عسكر فى الجيش المصرى و كانت فيه اسواق للمغاربه و لسه لغايه النهارده موجوده فى القاهره اماكن باسم المغاربه زى عطفه المغاربه و زاويه سيف المغربى و عطفه المغربى و درب المغاربه و غيرها. الدارسين و اهل العلم المغاربه كان ليهم رواق مخصص فى الجامع الازهر فى القاهره اسمه ” رواق المغاربه ” غرب صحن الجامع و ليه باب اسمه ” باب المغاربه “. من اشهر المورخين المغاربه اللى اتمصروا و عاشوا فى اسكندريه كان النويرى الاسكندرانى اللى كتب كتاب ” الالمام ” المشهور عن وقعه اسكندريه. و من مشاهير الصوفيه اللى ليهم معزه عند المغاربه و المصريين السيد البدوى اللى اتولد فى مدينه فاس المغربيه و ليه جامع مشهور باسمه فى طنطا فيه مقامه و ابو العباس المرسى اللى ليه جامع فى اسكندريه و غيرهم.
المغرب فيها اثار كتيره من كذا عصر منها الرومانى و الاسلامى و من اشهر الاثار الاسلاميه جامع الكتبيه فى مراكش و جامع حسان فى الرباط (من اثار يعقوب المنصور) و المدارس المرينيه فى فاس اللى بترجع للقرنين تلتاشر و اربعتاشر.
تاريخ المغرب تاريخ قديم و عريق بنا فيها الفنيقيين كذا مركز على سواحلها زى طنجه و مليله و العرائش. فى القرن الساتت بقت مراكز الفنيقيين تابعه للقرطاجيين و بعدين اخدها و بقت العاصمه هى مدينه وليلى و فى القرن الخامس استوطنها الوندال و بعدين اخدها البيزنطيين (533) و العرب (683). و اتاسست امارات مستقله زى “بنو مدرار” فى سلجماسه. و حصلت فوضى لغايه ما جه “ادريس بن الحسن” و اسس دوله الادارسه و اتبنت مدينه فاس و جامع القرويين (859)، و بعدهم جم الفاطميين لغايه ما ضعفت دولتهم و انفصلت الاجزاء الغربيه و كونت دويلات صغيره.
المرابطين قدرو يوحدو المغرب لاول مره (1053-1147) و من اهم ملوكهم كان يوسف ابن تاشفين اللى اسس مدينه مراكش (1062) ، و على بن يوسف اللى فى فتره حكمه قدر المغاربه يخضعو ملوك الطوائف فى الاندلس، و ظهر الموحدين بزعامه “ابن تومرت” و خلفه “عبد المومن على” (1130) اللى اخد مدينه فاس (1145) و قضى على المرابطين و خلفه ابنه “يوسف بن عبد المومن” (1163) اللى وحد الاندلس و المغرب و انتصر ابنه “يعقوب المنصور” على الاسبان فى معركه الاراك سنه 1195. المغاربه عملوا جهد كبير للمحافظه على الاندلس و خاضوا حروب كبيره لكن اللاتين اتحدوا ضدهم و شنوا عليهم حروب صليبيه ضخمه كانت جزء من الحروب الصليبيه على مصر و الشرق كان صعب الصمود قدامها بسبب كبر حجم الجيوش المهاجمه و بسبب الخلافات اللى حصلت مابين ملوك الاندلس اللى اتعرفوا ب ملوك الطوائف.
ابن بطوطه عاش فى عصر بنى مرين و زار مصر و وصفها بام البلاد.
بعد افول نجم دوله الموحدين قامت على انقاضها دوله المرينيين (بنو مرين) و كان من اشهر ملوكهم “ابو الحسن على” و ابنه “عنان المرينى” و ايامهم وصلت المغرب لدرجه كبيره من التقدم العلمى و التحضر.
الرحاله “ابن بطوطه” صاحب الكتاب المشهور “تحفه النظار فى غرائب الامصار و عجائب الاسفار” عاش فى عصر دوله المرينيين و بيعتبر من اشهر المغاربه و زار مصر فى عهد السلطان الناصر محمد بن قلاوون و انبهر بيها و وصفها بانها ام البلاد.
بعد المرينيين حكم الوطاسيين (1470) و فى عصرهم احتل الاسبان و البرتغاليين مدينه سبته و طنجه و مليله و غيرها من مدن السواحل ، و بعد المرينيين اسس “محمد القائم بامر الله” دوله الاشراف السعديين (1510-1659) و خلفه السلطان احمد الرابع و عمل نهضه اقتصاديه كبيره و انتصر ع البرتغاليين فى معركه وادى المخازن (القصر الكبير) سنه 1578.
التدخل الاجنبى
فى القرنين السبعتاشر و التمنتاشر انتشرت القرصنه على السواحل و بقت للقراصنه مراكز على البر المغربى و ابتدى الاوروبيين يطمعو فى المغرب، لكن الدول الاوروبيه اتفقو فى موتمر مدريد سنه 1880 على انهم يحافظو على استقلالها و انتهاج سياسه الباب المفتوح فى التجاره، لكن حصلت خلافات بينهم، و على الرغم من ان فرنسا و انجلترا عملو الاتفاق الودى سنه 1904 لكن فضل الخلاف قايم بينهم، و فى الاخر اتوصلت الدول الكبرى فى موتمر الجزيره الخضرا سنه 1906 للسماح لفرنسا و اسبانيا بحط قوات بوليسيه تحت اشراف فرنساوى اسبانى، و فى اواخر سنه 1911 غزتها الجيوش الفرنساويه و الاسبانيه و نزل الاسبان على ساحل المغرب الشمالى و زحف الفرنساويه على مدينه فاس، و فى 30 مارس 1912 فرض الفرنساويه و الاسبان حمايتهم ع المغرب و اتقسمت مراكش لمنطقتين واحده فرنساويه و التانيه اسبانيه و عملو طنجه منطقه دوليه.
استقلال المغرب
ثار المغاربه و قاومو و كانت ثوره الريف سنه 1921 بقياده الامير “عبد الكريم الخطابى” من اشهر الثورات دى. و وقت الحرب العالميه التانيه نزلت قوات انجليزيه و امريكيه و احتلت المغرب. و كان السلطان محمد الخامس (او سيدى محمد بن يوسف) بيناصر الحركه الوطنيه المغربيه و بيشجعها فنفته فرنسا سنه 1952 لكن اضطرت بعد سنتين ترجعه لعرشه و اعترفت باستقلال المغرب و وحدته فى مارس 1956 و عملت اسبانيا زيها فى ابريل من نفس السنه، و اعلنت الدول الغاء منطقه طنجه الدوليه فرجعت تانى للمغرب و انضم المغرب للامم المتحده (1956).
بعد وفاه الملك محمد الخامس سنه 1961 خلفه ابنه الحسن التانى. و فى سنه 1971 اتكشفت موامره عليه اتدبرت بره المغرب و بعدها بسنه حصلت محاوله اغتيال اتزعمها الجنرال اوفقير المقرب ليه و اللى انتحر بعدها.
- عدد سكان المغرب العربي
- مبيانات و خرائط منطقة درعة
- مساحة الجزاير في المغرب العربي
- مساحة المغرب
